Defis arqalı jazıw

§65. Jıynaqlawshı máni bildiriwshi atlıqlardıń juplasıwınan jasalǵan jup sózler defis arqalı jazıladı: tálim-tárbiya, er-turman, qazan-tabaq, bala-shaǵa, azıq awqat, aǵa-ini, kempir-ǵarrı, ata-ana, qız-kelinshek, qurt-qumırısqa, qoy-eshki t.b.

§66. Ayqınlawısh-ayqınlanıwshı mánisinde juplasıp kelgen qospa atlıqlar defis penen jazıladı: general-mayor, xabarshı-aǵza, agronom-entimolog, mexanik-aydawshı, premier-ministr, vice-prezident t.b.

§67. Belgili bir aralıq yamasa keńisliktegi baǵıt-baǵdar, orın mánilerinde qollanılatuǵın qospa atlıqlardıń sıńarları defis penen jazıladı: Tashkent-Nókis (temir jolı), Nókis-Moynaq (asfalt jolı), Tashkent-Seul (hawa jolı) t.b.

§68. 1) sıńarları sinonimlik mánidegi jup sózler defis penen jazıladı: kúsh-quwat, ar-namıs, aman-saw, saw-salamat, arzıw-árman, jal-jaǵday, urıs-keyis, saz-sáwbet t.b.

2) óz ara antonimlik qatnastaǵı jup sózler defis penen jazıladı: jaqsı-jaman, azlı-kópli, úlken-kishi, alıs-beris, erteli-kesh, kúni-túni, uyqılı-oyaw t.b.

§69. Bir yamasa eki sıńarı da óz aldına mánige iye bolmaǵan jup sózler defis penen jazıladı: emin-erkin, aǵıl-tegil, mázi-mayram, sam-saz, tum-tus, lám-mim, shay-pay, nan-pan, suw-puw, malpaq-salpaq, olqı-solqı t.b.

§70. Juplasıp kelgen shamalıq hám toplaw sanlıqlar defis penen jazıladı: bir-eki, bes-altı, on-on bes, ekewlep-úshewlep, qırq-eliw, tórt-besten t.b.

§71. Morfologiyalıq forması birdey eki feyildiń juplasıwınan jasalǵan qospa feyiller defis arqalı jazıladı: ayttı-qoydı, isledi-tasladı, ketti-qaldı, jazdı-aldı, ishtim-qoydım, isleymen-taslayman, aytasań-qoyasań, ushadı-ketedi t.b.

§72. Qospa sózlerdiń sıńarları tákirarlanıp kelgende tómendegi jaǵdaylarda defis qoyılıp jazıladı:

1) sıńarları birdey ataw formadaǵı tákirar sózler: taw-taw, úyin-úyin, topar-topar, shoq-shoq, qap-qap, sóyley-sóyley, birim-birim, bólek-bólek, pada-pada, súriw-súriw, túrli-túrli, kem-kem, kele-kele, waqtı-waqtı t.b.

2) sıńarları hár túrli bolǵan tákirar sózler: kem-kemnen, ashıqtan-ashıq, qaraptan-qarap, on-onlap, júz-júzlep, ayma-ay, kúnbe-kún, kózbe-kóz, júzbe-júz, qolma-qol t.b.

3) tákirarlanıp kelgen eliklewish hám tańlaq sózlerdiń sıńarları defis penen jazıladı: jalt-jult, gúldir-gúldir, ǵashır-ǵashır, gúw-gúw, ǵırt-ǵırt, tars-turs, úwh-úwhlep, tasır-tusır, sholp-sholp t.b.

§73. Janapaylardıń ba-be (ma-me, pa-pe), ǵoy, ǵana, emish túrilerinen basqaları defis penen jazıladı: sonday-aq, kelseń-á, joǵ-á, qoysań-á t.b.

§74. Arab cifrı menen kelgen qatarlıq sannıń -ınshı, -inshi qosımtasınıń ornına defis qoyıladı: 5-mektep, 7-klass, 2016-jıl, 45-mákan puqaralar jıyını t.b.

Qatarlıq sanlardı bildiriwshi arab cifrları birneshe bolıp kelgende, olardıń sońǵısınan keyin defis qoyıladı: 4, 5, 8-mektepler, 6, 9-dúkanlar t.b.

Al, qatarlıq sandı bildiriwshi rim cifrınan keyin defis qoyılmaydı: XX ásir, IX klass, III bap t.b.