Sózlerdiń qosılıp jazılıwı
§47. Eki sózden quralǵan qospa sózlerdiń birewi óz aldına bólek turǵanda heshqanday máni ańlatpasa yamasa fonetikalıq ózgeriske ushırasa, olar qosılıp jazıladı: belbew, qarabaraq, búgin, bıyıl, bilezik, altaqta, qolǵap, ayǵabaǵar t.b.
§48. Eki hám onnan da kóp sózlerdiń qosılıwınan jasalǵan menshikli atlıqlar birigip jazıladı:
a) adam atları: Erniyaz, Allaniyaz, Muratbay, Barlıqbay, Miyratdin, Aysánem t.b.
b) birneshe sózdiń qosılıwınan dúzilgen qala, awıl, jer, suw (dárya, kól, ózek, arna) atamaların bildiretuǵın menshikli atlıqlar bas háripten baslanıp birigip jazıladı: Qońırat, Qanlıkól, Qaraózek, Taxtakópir, Bestóbe, Taqıyatas, Qazaqdárya, Aqdárya, Qarataw, Qattaǵar, Ellikqala, Qırqqız, Qoyqırılǵanqala, Qaraoy, Teńgeshashqan, Qarabuǵa, Shoqtorańǵıl, Sorkól, Aqsholaq t.b.
§49. Eki sózden quralıp, bir mánini ańlatatuǵın qospa sózler (haywanlardıń, quslardıń, balıqlardıń hám basqa da jánlik hám ósimliklerdiń túrlerin bildiretuǵın ǵalabalıq atlıqlar) hám aspan deneleriniń menshikli atamaları qosılıp jazıladı: jolbarıs, dáwseben, tasbaqa, alabuǵa (balıq), túyetawıq, shaytantawıq, aqqutan, almaqabaq, dasmalqabaq, bóribasar, alamoynaq, Jetiqaraqshı (juldız) t.b.
§50. Uzaq jıllar dawamında qosılıp aytılıp, semantikalıq jaqtan bir túsinikke iye bolıp ketken sózler birigip jazıladı: kúnshıǵıs, kúnbatıs, baspasóz, shiykizat, iytayaq, kózáynek, qoloramal, otaǵası, aqsaqal, besatar, besqonaq, kózqaras, qoljazba, ómirbayan, sarıawırıw, soqırishek, asqazan, demalıs t.b.
§51. Ózlestirilgen yamasa awdarma jasaw jolı menen ózlesken qospa sózler birigip jazıladı: kinoteatr, kinofilm, elektrostanciya, radioesittiriw, telekórsetiw, kinosayaxat, fotoqaǵaz, videokamera, fotosúwret t.b.
§52. Hár, hesh, gey, álle, bir sıyaqlı sózler ózinen soń kelgen almasıqlar, ráwishler menen qosılıp, bir túsinik bildirip kelse, qosılıp jazıladı: hárkim, hárbir, heshkim, heshqanday, állenebir, állekim, birneshe t.b.
Sonday-aq, bazıbir, geypara, birpara, birdeme, heshteńe, hárdayım, birotala, állenebir sıyaqlı ekinshi sıńarları óz aldına qollanılmaytuǵın sózler de qosılıp jazıladı.
§53. Qısqarǵan sózlerdiń barlıq túrleri hám olarǵa jalǵanatuǵın qosımtalar qosılıp jazıladı: NMPIdiń, QMUǵa, AQShqa t.b.