Túbir hám qosımtalardıń imlası

§37. Sózdiń túbiri n sesine tamamlanıp, oǵan b sesinen baslanǵan qosımta yamasa sóz qosılǵanda n sesi m sesine almasıp aytılsa da, sóz túbiri saqlanıp, n háribi jazıladı: nanbay (nambay emes), qanbadı (qambadı emes), minber (mimber emes), janbadı (jambadı emes), kónbedi (kómbedi emes), Qurbanbay (Qurbambay emes), Sársenbay (Sársembay emes), isenbedi (isembedi emes) t.b.

Sonday-aq, sózdiń aqırı n sesine tamamlanıp, oǵan l sesinen baslanǵan qosımta qosılsa, n sesi l ǵa aylanıp aytılsa da, jazıwda n saqlanıp jazıladı: janlıq (jallıq emes), sanlıq (sallıq emes), kúnlikshi (kúllikshi emes), jánlik (jállik emes) t.b.

§38. Sózdiń aqırı n sesine tamamlanıp, oǵan q, k, ǵ, g seslerinen baslanǵan qosımta qosılsa, n sesi ń sesine aylanıp aytıladı, biraq n saqlanıp jazıladı: jonqa (jońqa emes), minges (mińges emes), qonǵan (qońǵan emes), azanǵı (azańǵı emes) t.b.

§39. Sózdiń aqırı s, z seslerine pitken sózlerge sh sesinen baslanǵan qosımtalar jalǵanǵanda s, z sesleri sh sesine aylanıp aytılsa da, sóz túbirindegi s, z háripleri saqlanıp jazıladı: basshı (bashshı emes), qusshı (qushshı emes), duzshı (dushshı emes), qosshı (qoshshı emes) t.b.

Sonday-aq, sózdiń aqırı z sesine tamamlanıp, oǵan s sesinen baslanǵan qosımta qosılsa, z sesi s sesine aylanıp aytıladı, biraq z saqlanıp jazıladı: jazsın (jassın emes), qazsın (qassın emes), azsın (assın emes), dúzsin (dússin emes) t.b.

§40. Sózlerdiń aqırı q, k, p dawıssızlarına tamamlanıp, oǵan dawıslıdan baslanǵan qosımta jalǵanǵanda q sesi ǵ sesine, k sesi g sesine, p sesi b sesine ózgeredi hám sol ózgergen túrinde jazıladı: taraq–taraǵı, quraq–quraǵı, balıq–balıǵı, talaq–talaǵı, kórik–kórigi, shórek–shóregi, tik–tigis, ek–egis, kitap–kitabı, qap–qabı, sap–sabı t.b. Biraq, gáp, tip, shaq, huqıq, shkaf, mif, telegraf sıyaqlı sózlerge sol qosımtalar jalǵanǵan menen, túbir sózdiń aqırında ózgeris bolmaydı: gáp–gápi, tip–tipi, shaq–shaqı, huqıq–huqıqı, shkaf–shkafı, mif–mifi, telegraf–telegrafı t.b.

§41. Aqırı p dawıssızına tamamlanǵan ayırım feyil sózlerge -ıp, -ip qosımtası jalǵanǵanda p sesi w sesine almasıp aytıladı hám sol almasqan túrinde jazıladı: tap–tawıp, sep–sewip, tep–tewip, jap–jawıp, kep–kewip t.b.

§42. Ayırım túbir sózlerge tartım jalǵawı jalǵanǵanda ı, i qısıq dawıslıları túsirilip jazıladı: xalıq–xalqı, bórik–bórki, kórik–kórki, erin–erni, orın–ornı, qarın–qarnı, awız–awzı, murın–murnı, moyın–moynı, qoyın–qoynı t.b. Al geypara awıl, julın, kiyim, erik, buyım, sherik, tilik sıyaqlı sózlerge jalǵansa, túbir sózdiń sońǵı buwınındaǵı dawıslı háripler túsirilmey jazıladı: awılı, julını, qulını, kiyimi, erigi, buyımı, sherigi, tiligi t.b.

§43. Aqırı birdey eki dawıssızǵa pitken ózlestirme sózlerge qosımta qosılsa, bul dawıssız háriplerdiń birewi túsirilip jazıladı: metall–metalı, metaldan, metallar; klass–klası, klastan, klassız; kilogramm–kilogramı, kilogramlap, kilogramnan t.b.

§44. Aqırı kt, ng, nk, ńk, mn, zd, st, rk, sk sıyaqlı qabatlasqan dawıssızlarǵa tamamlanǵan sózlerge qosımtalar tikkeley jalǵana beredi: bank–bankke, gimn–gimnniń, poezd–poezdda, tekst–tekstten, park–parkke, reńk–reńkleri, Minsk–Minskke t.b.

§45. Familiya jasawshı -ov, -ova, -ev, -eva qosımtaları adam atlarınıń aqırǵı sesi dawıssızǵa pitkende -ov, -ova, al dawıslıǵa pitse -ev, -eva túrinde jalǵanadı: Nurmuhammedov, Yusupov, Mámbetov, Bahadırova, Dáwqaraev, Mátekeev, Esmırzaeva t.b. Sonday-aq, y dawıssızına tamamlanǵan adam atlarına -ev, -eva qosımtaları qosılǵanda y dawıssızı túsip qaladı: Bazarbaev, Sársenbaev, Qalbaev, Qurbanbaeva t.b.

§46. Familiyalardıń sońǵı buwınınıń juwan ya jińishkeligine qaray qosımtalar da soǵan sáykes juwan ya jińishke túrinde jalǵanadı: Aytbaevaǵa, Yusupovqa, Erekeevke, Erekeevaǵa, Álievte, Elmuratovaǵa, Otarovanı, Ótegenovqa t.b.