Únli dawıssızlar

§12. Bb háribi túpkilikli sózlerdiń basında hám ortasında jazıladı: bayraq, bayram, baǵ, baqsha, bala, bilim, baba, bazar, tabıs, balıq, sabın, jaba t.b. Al, geypara ózlestirme sózlerdiń aqırında p bolıp aytılsa da, b háribi jazıladı: arab, klub, shtab t.b.

§13. Dd háribi sózlerdiń esitilgen jerlerinde jazıla beredi: duz, dúz, dos, dala, dana, dúnya, dárya, dıqqat, dizim, pada, adam, joldas, qurdas, abadan.

Awızeki sóylewde shad, pud, yad, áwlad, sud, zavod, Xalqabad sıyaqlı sózlerde t bolıp aytılǵanı menen, d jazıladı.

§14. Gg háribi kóbinese jińishke dawıslılar menen kelip, sózlerdiń basında, ortasında jazıladı: gáp, gúl, geshir, gósh, gilem, gúrish, tógin, bóget, segiz, tegis, búgin t.b., al ózlestirme sózlerdiń aqırında da jazıladı: biolog, xirurg, pedagog, filolog, geolog t.b.

§15. Ǵǵ háribi juwan dawıslılar menen kelip, sózlerdiń basında, ortasında jiyirek, al ayırım jaǵdaylarda sóz aqırında jazıladı: ǵaz, ǵayrat, ǵarbız, ǵumsha, ǵarǵa, ǵarrı, ǵalaba, ǵoza, baǵana, taǵa, aǵa, toǵay, shaǵala, toǵız, baǵ, t.b. Sonday-aq, ǵálle, ǵárejet, ǵáziyne, ǵázzel, ǵálet, ǵárezsizlik t.b. sıyaqlı sózlerde jińishke dawıslı menen de bir buwında jazıladı.

§16. Jj háribi sózlerdiń basında, ortasında hám siyrek jaǵdayda aqırında da jazıladı: jaz, jan, jaylaw, jáhán, jańa, jamǵır, jaǵa, jeń, jiyde, jurnal, jez, shóje, góje, hújjet, tiraj, taj, Minaj, ilaj, mútáj t.b.

§17. Ll háribi sózlerdiń barlıq esitilgen jerlerinde jazıladı: lala, dala, qala, lap, láblebi, pálle, ǵálle, pille, al, sal, awıl, pil, bil, til, salma, talaq, baldaq, lenta, laborant, ılaqa, ılay, material, gúl t.b.

§18. Mm háribi sózdiń barlıq esitilgen jerlerinde jazıladı: mal, may, mol, mala, muz, murın, mektep, keme, aman, samal, múmkin, gúmbez, ilham, tam, qálem, kólem, ilim, magnit, makaron, Murat, Miyras t.b.

§19. Nn háribi sózdiń barlıq esitilgen jerlerinde jazıladı: ana, nan, nama, naqıl, naǵıs, tana, náwshe, nálshe, dene, mákan, kún, qulan, jılan, qan, qanar, neft, nasos, notarius, nota, Naǵmet, Naǵıyma, Nazarbay t.b.

§20. Ńń háribi sózdiń ortasında hám aqırında jazıladı: ań, tań, seń, soń, toń, kóń, keń, teń, sheńgel, teńge, deńgene, shúńgil, dońız, ańız, jańa, Jańıl, Jańabay, Teńel, keńse, ańsat, jańǵaq, jańǵırıq, jońıshqa t.b.

§21. Rr háribi sózlerdiń ortasında hám aqırında esitiliwinshe jazıladı: arba, ara, tarı, arpa, ıras, ırash, ıray, ırısqı, urıq, qurıq, jarıs, qarıq, sarı, ar, tar, tomar, Pirnazar t.b. Sózlerdiń basında qısqa ı, i, u, ú dawıslıları esitilse de, ol jazıwda saqlanbaydı: ret, reń, rásmiy, roman, razı, raxmet, Raziya, Reyim, Rayxan, Ramet, Rústem t.b.

§22. Vv háribi vagon, voleybol, vanna, vatman, volt, vazelin, velosiped, vokzal, valyuta, vulkan, avtobus t.b. sıyaqlı ózlestirilgen sózlerde jazıladı.

§23. Ww háribi sózlerdiń barlıq esitilgen orınlarında jazıladı: Watan, waqıt, wáde, wákil, wáj, wálayat, wásiyat, wázir, qawın, jawın, awlaq, sawda, hawa, súwen, awqam, jawlıq, quwraq, aq, baw, suw, taw, saw, altaw, qosıw, bólıw t.b.

§24. Yy háribi sózlerdiń barlıq esitilgen jerlerinde jazıladı. Sózdiń, buwınnıń basında: ya, yar, yaqshı, yamasa, yapırmay, yarım, Yaqıp, yapon, yumor, yosh, yod, yubiley, yurist, yusticiya; sózdiń ortasında hám aqırında: ay, jay, may, tay, toy, qoy, bay, say, bayraq, qoyan, tayaq, túye, biye, Baykal t.b.

§25. Zz háribi sózlerdiń barlıq orınlarında qollanıladı hám jazıladı: zar, zor, zaman, zárúr, zıyan, zıyat, zerger, azada, gúz, gúze, júzim, atız, qaǵaz, zúráát, zavod, zoologiya, lebiz, segiz t.b.